Bydd mân anafiadau i’r llygaid, fel siampŵ neu lwch yn eich llygad, yn aml yn gwella ar eu pen eu hunain o fewn diwrnod. Mynnwch help meddygol os oes gennych gemegyn yn eich llygad neu os bydd rhywbeth yn treiddio iddo.
Ewch i’r Adran Damweiniau ac Achosion Brys (A&E) neu ffoniwch 999:
- os bydd cemegyn cryf, fel glanhawr popty neu gannydd, yn eich llygad – parhewch i olchi eich llygad gyda dŵr tra byddwch chi’n aros am help meddygol
- os oes rhywbeth miniog wedi treiddio i’ch llygad
- os oes rhywbeth wedi taro eich llygad ar gyflymder mawr – er enghraifft wrth ddefnyddio offer pŵer neu dorri’r lawnt
- os oes unrhyw newidiadau i’ch golwg ar ôl anaf i’r llygad
- os oes gennych gur pen/pen tost, tymheredd uchel neu os ydych chi’n sensitif i olau
- os ydych chi’n teimlo’n fel chwydu neu yn chwydu ar ôl anaf i’r llygad
- os na allwch symud eich llygad na’i gadw ar agor
- os oes gwaed neu grawn yn dod o’ch llygad
Chwiliwch am eich A&E agosaf
Sut i drin anaf i’r llygad gartref
- golchwch eich llygad gyda dŵr glân os oes rhywbeth ynddo
- dilynwch y cyngor ar y deunydd pecynnu os bydd colur neu nwyddau’r cartref yn mynd i’ch llygaid
- llyncwch boenleddfwyr fel parasetamol neu ibuprofen i leddfu unrhyw boen neu anghysur
Peidiwch â:
- cheisio tynnu unrhyw wrthrych sydd wedi treiddio i’ch llygad
- cyffwrdd na rhwbio eich llygad hyd nes bydd yn well
- gwisgo colur o gwmpas eich llygad hyd nes bydd yn well
- gwisgo lensys cyffwrdd hyd nes bydd eich llygad yn well
Sut i olchi eich llygad
Dylech:
- ddefnyddio dŵr glân (nid poeth) – gall hwn fod o’r tap, o’r gawod neu ddŵr potel os na fyddwch gartref
- dal eich llygad ar agor
- rhedeg llawer o ddŵr dros belen eich llygad am o leiaf 20 munud
Gwnewch yn siŵr nad yw llif y dŵr yn rhy gryf.
Ewch i weld optometrydd/optegydd neu ffoniwch 111:
- os nad yw eich llygad yn gwella ymhen 24 awr
- os ydych chi’n poeni am eich anaf
Chwiliwch am optometrydd/optegydd