Llewygu yw pan fyddwch chi’n mynd yn anymwybodol am gyfnod byr. Nid yw’n arwydd o unrhyw beth difrifol fel arfer, ond os bydd yn digwydd yn rheolaidd, dylech weld meddyg teulu.
Achosion llewygu
Mae sawl rheswm pam y gallai rhywun lewygu. Mae’r achosion yn cynnwys:
- sefyll yn rhy gyflym – gallai hyn fod yn arwydd o bwysedd gwaed isel
- peidio â bwyta neu yfed digon
- bod yn rhy boeth
- wedi ypsetio neu’n flin iawn, neu mewn poen difrifol
- problemau’r galon
- cymryd cyffuriau neu yfed gormod o alcohol
Symptomau llewygu
Mae llewygu’n digwydd yn sydyn, fel arfer. Gall symptomau gynnwys:
- pendro
- croen oer a chwysu
- llefaredd aneglur
- teimlo fel eich bod am chwydu
- newidiadau i’ch golwg
Ewch i weld meddyg teulu:
- os ydych chi wedi llewygu ac nid ydych yn gwybod pam
- os ydych chi wedi llewygu’n ddiweddar, fwy nag unwaith
Rhaid i chi ddweud wrth yr Asiantaeth Drwyddedu Gyrwyr a Cherbydau (DVLA) os ydych chi’n llewygu’n rheolaidd, oherwydd gallai effeithio ar eich gallu i yrru.
Darganfyddwch sut i ddweud wrth y DVLA am lewygu.
Pethau y gallwch chi eu gwneud i atal llewygu
Os ydych chi’n teimlo’ch bod chi ar fin llewygu, ceisiwch:
- orwedd gyda’ch coesau wedi’u codi – os na allwch chi wneud hyn, eisteddwch gyda’ch pen rhwng eich pengliniau
- yfed dŵr
- bwyta rhywbeth
- anadlu’n ddwfn
Os byddwch yn gweld rhywun yn llewygu
Os ydych chi gyda rhywun sydd wedi llewygu, peidiwch â chynhyrfu.
Os oes modd, gorweddwch yr unigolyn ar ei gefn a chodi’i goesau.
Fel arfer, bydd y sawl sydd wedi llewygu yn dihuno o fewn 20 eiliad.
Ffoniwch 999:
Os bydd rhywun yn llewygu ac:
- ni allant gael eu dihuno ar ôl munud
- maent wedi gwneud dolur difrifol i’w hunain yn sgil cwympo
- maent yn siglo neu’n ysgytio oherwydd trawiad neu ffit