Twll yn nhympan y glust yw tympan drydyllog y glust neu dympan rwygiedig y glust. Fel arfer bydd yn gwella ymhen ychydig wythnosau ac efallai na fydd angen unrhyw driniaeth.
Ond mae'n syniad da i weld meddyg teulu os ydych chi'n meddwl bod tympan eich clust wedi rhwygo, gan y gall achosi problemau fel heintiau ar y glust.
Symptomau tympan drydyllog y glust
Mae arwyddion tympan drydyllog y glust neu haint ar y glust yn cynnwys:
- colli clyw yn sydyn - efallai y byddwch chi'n cael anhawster clywed unrhyw beth neu efallai y bydd eich clyw ychydig yn aneglur
- pigyn clust neu boen yn eich clust
- cosi yn eich clust
- hylif yn gollwng o'ch clust
- tymheredd uchel
- canu neu sïo yn eich clust (tinitws)
Bydd y symptomau yn dod i ben fel arfer pan fydd tympan eich clust wedi gwella a phan fydd unrhyw haint wedi'i thrin.
Pryd i weld meddyg teulu
Ewch i weld meddyg teulu:
- os ydych chi'n meddwl bod tympan drydyllog y glust gennych
- rydych eisoes wedi gweld meddyg teulu ac nid yw eich symptomau ddim gwell ar ôl ychydig wythnosau neu rydych chi'n cael symptomau newydd (fel pigyn clust, twymyn, cosi neu hylif yn gollwng o'r glust)
Fel arfer bydd tympan eich clust yn gwella heb driniaeth, ond gall meddyg teulu wirio am haint (y gall fod angen ei thrin) a siarad â chi am sut y gallwch ofalu am eich clust.
Bydd yn edrych i mewn i'ch clust gan ddefnyddio tortsh llaw fach gyda lens chwyddo. Bydd blaen hon yn mynd i mewn i'ch clust, ond dim ond ychydig bach, ac ni ddylai wneud dolur.
Pethau y gallwch chi wneud os oes gennych dympan drydyllog y glust
Nid oes angen trin tympan drydyllog y glust bob tro gan y bydd yn gwella ohono'i hun ymhen ychydig wythnosau fel arfer.
Pan fydd yn gwella, gall y cynghorion canlynol eich helpu i leddfu eich symptomau a lleihau'r siawns o gael haint yn eich clust.
- peidiwch â rhoi unrhyw beth yn eich clust fel ffyn cotwm neu ddiferion clust (oni bai bod eich meddyg yn eu hargymell)
- peidiwch â chael dŵr yn eich clust - peidiwch â mynd i nofio a byddwch yn ofalus iawn wrth gael cawod neu olchi eich gwallt
- ceisiwch beidio â chwythu'ch trwyn yn rhy galed, gan y gall hyn ddifrodi tympan eich clust wrth iddi wella
- daliwch glwt cynnes yn erbyn eich clust i helpu lleihau unrhyw boen
- cymerwch boenladdwyr fel parasetamol neu ibwproffen i leddfu poen os oes angen (peidiwch â rhoi aspirin i blant o dan 16 oed)
Triniaethau ar gyfer tympan drydyllog y glust
Os oes gennych haint ar y glust wedi'i hachosi gan dympan drydyllog y glust, efallai y bydd meddyg teulu yn rhoi presgripsiwn am wrthfiotigau.
Os yw'r twll yn nhympan eich clust yn fawr neu os nad yw'n gwella ymhen ychydig wythnosau, gall meddyg teulu eich atgyfeirio at arbenigwr clustiau i siarad â chi ynglŷn â chael llawdriniaeth i atgyweirio tympan drydyllog y glust.
Achosion tympan drydyllog y glust
Gall twll yn nhympan y glust gael ei achosi gan:
- haint ar y glust
- anaf i dympan y glust, fel ergyd i'ch clust neu brocio rhywbeth fel ffon gotwm yn ddwfn i mewn i'ch clust
- newidiadau mewn gwasgedd aer, fel wrth hedfan neu sgwba-blymio
- sŵn uchel sydyn, fel ffrwydrad
Gall y cynghorion canlynol eich helpu i osgoi niweidio tympan eich clust:
- ewch i weld meddyg teulu os oes gennych symptomau haint ar y glust am fwy na 2 neu 3 diwrnod
- peidiwch â gwthio unrhyw beth yn ddwfn i mewn i'ch clustiau, gan gynnwys eich bysedd
- gwisgwch amddiffyniad addas i'ch clustiau os ydych ynghanol synau uchel yn aml
- wrth hedfan, ceisiwch lyncu, agor eich ceg, cnoi gwm neu sugno losinen galed wrth godi neu lanio