Nid oes angen cymorth meddygol brys fel arfer ar flinder gwres os gallwch oeri o fewn 30 munud. Os yw'n troi'n strôc gwres, mae angen ei drin fel argyfwng.

Symptomau blinder gwres

Mae arwyddion blinder gwres yn cynnwys:

• blinder
• pendro
• cur pen
• teimlo'n sâl neu fod yn sâl
• chwysu gormodol a chroen yn mynd yn welw ac yn gludiog neu gael brech gwres, ond gall newid mewn lliw croen fod yn anoddach i'w weld ar groen brown a du
• crampiau yn y breichiau, y coesau a'r stumog
• anadlu neu guriad calon cyflym
• tymheredd uchel
• bod yn sychedig iawn
• gwendid

Mae symptomau blinder gwres yn aml yr un fath mewn oedolion a phlant, er y gall plant fynd yn bigog hefyd.

Os yw rhywun yn dangos arwyddion o flinder gwres mae angen eu hoeri a rhoi hylifau iddynt.

Pethau y gallwch eu gwneud i oeri rhywun

Os oes gan rywun flinder gwres, dilynwch y 4 cham hyn:

1. Symudwch nhw i le oer.
2. Tynnwch yr holl ddillad diangen fel siaced neu sanau.
3. Gwnewch iddyn nhw yfed diod chwaraeon neu ddiod ailhydradu, neu ddŵr oer.
4. Oerwch eu croen - chwistrellwch neu sbwngiwch nhw â dŵr oer a'u ffanio. Mae pecynnau oer, wedi'u lapio mewn lliain a'u rhoi o dan y ceseiliau neu ar y gwddf, yn dda hefyd.

Arhoswch gyda nhw nes eu bod nhw'n well.

Dylent ddechrau oeri a theimlo'n well o fewn 30 munud.

Cysylltwch ag 111 os:

• oes gennych chi neu rywun arall symptomau blinder gwres rydych chi'n ei chael hi'n anodd eu trin neu os oes angen cyngor arnoch chi amdanynt

Gallwch ffonio 111 neu gael cymorth gan 111 ar-lein.

Ffoniwch 999 os:

Oes gennych chi neu rywun arall unrhyw arwyddion o strôc gwres gan gynnwys:

• yn dal yn sâl ar ôl 30 munud o orffwys mewn lle oer, cael eich oeri ac yfed hylifau
• tymheredd uchel iawn
• croen poeth nad yw'n chwysu ac a allai edrych yn goch (gall hyn fod yn anoddach i'w weld ar groen brown a du)
• curiad calon cyflym
• anadlu cyflym neu fyrder anadl
• dryswch a diffyg cydlyniad
• trawiad neu ffit
• colli ymwybyddiaeth

Rhowch y person yn y safle adfer os ydynt yn colli ymwybyddiaeth tra byddwch chi'n aros am gymorth.

Peidiwch â gyrru'ch hun i'r Adran Damweiniau ac Achosion Brys.

Bydd y person rydych chi'n siarad ag ef ar 999 yn rhoi cyngor i chi ynglŷn â beth i'w wneud.

Atal blinder gwres a strôc gwres

Mae risg uchel o flinder gwres neu strôc gwres yn ystod tywydd poeth neu ymarfer corff.

I helpu i atal blinder gwres neu strôc gwres:

• yfwch fwy o ddiodydd oer, yn enwedig os ydych chi'n egnïol neu'n ymarfer corff
• gwisgwch ddillad lliw golau, llac
• osgowch yr haul rhwng 11am a 3pm
• osgowch ormod o alcohol
• osgowch ymarfer corff eithafol
• os ydych chi y tu mewn ar ddiwrnod poeth iawn, caewch y llenni, caewch y ffenestri os yw'n boethach y tu allan nag yn eich cartref a diffoddwch offer trydanol a goleuadau sy'n mynd yn boeth

Bydd hyn hefyd yn atal dadhydradiad ac yn helpu'ch corff i gadw ei hun yn oer.

Mae plant, pobl hŷn a phobl â chyflyrau iechyd hirdymor (fel diabetes neu broblemau'r galon) mewn mwy o berygl o flinder gwres neu strôc gwres.

Dysgwch sut i adnabod dadhydradiad.