Cyflwyniad

Gall brechlynnau’r gaeaf eich helpu chi a’ch teulu i gael amddiffyniad rhag afiechydon yn ystod misoedd y gaeaf. Gallant helpu i atal salwch difrifol a helpu i leihau’r pwysau ar wasanaethau’r GIG.

Brechlynnau sydd ar gael y gaeaf hwn

Brechlyn y ffliw

Mae brechlyn y ffliw yn helpu i amddiffyn rhag y feirysau ffliw sydd fwyaf tebygol o ledaenu bob gaeaf. Gall ffliw wneud rhai pobl yn sâl iawn, yn enwedig oedolion hŷn, plant ifanc a phobl sydd â chyflyrau iechyd penodol.

Efallai eich bod yn gymwys i gael brechlyn ffliw os ydych:

• Yn 65 oed neu’n hŷn
• Yn feichiog
• Â chyflwr iechyd hirdymor, megis problem anadlu, ar y galon, yr afu neu’r arennau
• Yn gweithio ym maes iechyd neu ofal cymdeithasol
• Â phlentyn 2 neu 3 oed (gall rhai plant ysgol gynradd hefyd gael cynnig y brechlyn drwy’r ysgol)

Gallwch ddod o hyd i fwy o wybodaeth yma: Brechlyn ffliw - Iechyd Cyhoeddus Cymru

Brechlyn COVID-19

Mae brechlyn COVID-19 yn helpu i amddiffyn rhag salwch difrifol ac yn lleihau’r risg o orfod mynd i’r ysbyty.

Efallai y cewch gynnig dos atgyfnerthu COVID-19 tymhorol os ydych:

• Yn 75 oed neu’n hŷn
• Yn byw mewn cartref gofal
• Â system imiwnedd sydd wedi gwanhau
• Yn gweithio ym maes iechyd neu ofal cymdeithasol

Os ydych yn gymwys, dylech gael gwahoddiad i gael eich brechu. Os ydych chi’n meddwl y dylech fod wedi cael gwahoddiad ond nad ydych wedi clywed dim, cysylltwch â’ch bwrdd iechyd lleol neu ewch i: Brechlyn COVID-19 - Iechyd Cyhoeddus Cymru

Brechlyn feirws syncytial anadlol (RSV)

Mae RSV yn feirws cyffredin a all achosi heintiau difrifol yn y frest ac anawsterau anadlu. Gall fod yn arbennig o beryglus i fabanod ifanc ac oedolion hŷn.

Efallai y byddwch yn gymwys i gael y brechlyn RSV os ydych:

• Yn feichiog – mae cael y brechlyn yn ystod beichiogrwydd yn helpu i ddiogelu eich babi yn ystod misoedd cyntaf ei fywyd
• Yn 75 oed neu’n hŷn
• Yn byw mewn cartref gofal i oedolion hŷn

Mae’r brechlyn RSV yn helpu:

• Diogelu babanod rhag heintiau RSV difrifol
• Lleihau’r risg o salwch difrifol, derbyniad i’r ysbyty a marwolaeth ymhlith oedolion hŷn
• Lleihau’r pwysau ar feddygfeydd teulu ac ysbytai yn ystod y gaeaf

Mae rhagor o wybodaeth ar gael yma: Brechlyn firws syncytial anadlol (RSV) - Iechyd Cyhoeddus Cymru

Pam mae brechiadau’n bwysig?

Mae afiechydon y gaeaf yn lledaenu’n haws yn ystod y misoedd oerach. Gall cael eich brechu helpu:

• Eich diogelu rhag mynd yn sâl iawn
• Lleihau heintiau’n lledaenu i bobl eraill
• Diogelu pobl sy’n fwy agored i niwed
• Helpu’r GIG i ymdopi â’r galw ychwanegol yn ystod y gaeaf

Sut alla i gael fy mrechu?

• Efallai y byddwch yn cael gwahoddiad gan eich meddygfa deulu neu’ch bwrdd iechyd lleol
• Gall brechlynnau fod ar gael drwy feddygfeydd teulu, fferyllfeydd, clinigau cymunedol neu raglenni brechu ysgolion
• Os ydych yn gymwys, cewch wybod sut a ble i archebu

Os ydych yn meddwl eich bod yn gymwys ond nad oes neb wedi cysylltu â chi, siaradwch â’ch meddygfa deulu neu fferyllfa leol.

A yw’n ddiogel cael mwy nag un brechlyn?

Ydy. Mae’n ddiogel cael mwy nag un brechlyn ar yr un pryd, megis brechlynnau’r ffliw a COVID-19. Bydd gweithiwr gofal iechyd proffesiynol yn eich cynghori.

Rhagor o wybodaeth

Am ragor o wybodaeth am frechlynnau’r gaeaf yng Nghymru, siaradwch â’ch meddyg teulu neu fferyllydd, neu ewch i Imiwneiddio a brechlynnau - Iechyd Cyhoeddus Cymru