Cyflwyniad
Llosg cylla/dŵr poeth yw'r llosgi yn y frest sy'n cael ei achosi wrth i asid y stumog deithio i fyny tuag at y gwddf (adlif asid). Os yw'n digwydd yn fynych, yr enw arno yw clefd adlif sefnigol (GORD).
Gwirio a oes gennych adlif asid
Dyma brif symptomau adlif asid:
- llosg cylla/dŵr poeth - teimlad o losgi yng nghanol y frest
- blas sur, annymunol yn eich ceg, y mae asid y stumog yn ei achosi
Hefyd, gall fod gennych:
- beswch neu igian sy'n digwydd yn fynych
- llais cryg
- anadl ddrwg
- bol chwyddedig a chyfog
Yn ôl pob tebyg, bydd eich sympomtau'n waeth ar ôl bwyta, wrth orwedd ac wrth blygu.
Achosion llosg cylla/dŵr poeth ac adlif asid
Mae llawer o bobl yn cael llosg cylla/dŵr poeth o bryd i'w gilydd. Yn aml, nid oes rheswm amlwg drosto.
Weithiau, bydd y canlynol yn ei achosi neu'n ei waethygu:
- bwydydd a diodydd penodol - fel coffi, alcohol, siocled a bwydydd brasterog neu sbeislyd
- bod dros eich pwysau
- ysmygu
- beichiogrwydd
- straen a gorbryder
- rhai meddyginiaethau, fel poenleddfwyr gwrthlid (fel ibuprofen)
- hernia bwlch (hiatus hernia) - pan fydd rhan o'ch stumog yn symud i fyny i'ch brest
Sut gallwch chi leddfu llosg cylla/dŵr poeth ac adlif asid eich hun
Gall newidiadau syml i'ch ffordd o fyw helpu atal neu leihau llosg cylla/dŵr poeth.
- bwytewch brydau llai, yn amlach
- codwch ben eich gwely 10 i 20cm trwy roi rhywbeth o dan eich gwely neu'ch matras - gwnewch hynny fel bod eich brest a'ch pen uwchlaw lefel eich canol, fel nad yw asid y stumog yn teithio i fyny tuag at eich gwddf
- ceisiwch golli pwysau os ydych chi dros bwysau
- ceisiwch ddod o hyd i ffyrdd o ymlacio
Peidiwch â
- chael bwyd neu ddiod sy'n sbarduno'ch symptomau
- bwyta o fewn 3 neu 4 awr cyn mynd i'r gwely
- gwisgo dillad sy'n dynn o gwmpas eich canol
- ysmygu
- yfed gormod o alcohol
- rhoi'r gorau i gymryd meddyginiaeth sydd gennych ar bresgripsiwn, heb siarad â meddyg yn gyntaf
Gall fferyllydd helpu gyda llosg cylla/dŵr poeth ac adlif asid
Siaradwch â fferyllydd am gyngor os ydych chi'n cael llosg cylla/dŵr poeth yn aml.
Gall argymell meddyginiaethau o'r enw gwrthasidau, sy'n gallu helpu lleddfu'ch symptomau.
Cymryd y rhain gyda bwyd neu'n fuan ar ôl bwyta sydd orau, oherwydd dyma pryd y byddwch chi'n fwyaf tebygol o gael llosg cylla/dŵr poeth. Gallant weithio am gyfnod hwy hefyd os byddwch yn eu cymryd gyda bwyd.
Dod o hyd i fferyllfa
Ewch i weld meddyg teulu:
- os nad yw newidiadau i'ch ffordd o fyw a meddyginiaethau o'r fferyllfa yn helpu
- os ydych cyn cael llosg cylla/dŵr poeth bron bob dydd, am 3 wythnos neu fwy
- os oes gennych symptomau eraill, fel bwyd yn mynd yn gaeth yn eich gwddf, chwydu'n fynych neu golli pwysau heb reswm
Gall meddyg teulu ddarparu triniaethau cryfach a helpu diystyru unrhyw achosion mwy difrifol posibl eich symptomau.
Triniaeth gan feddyg teulu
I leddfu'ch symptomau, gallai eich meddyg teulu roi meddyginiaeth i chi ar bresgripsiwn sy'n lleihau faint o asid sy'n cael ei gynhyrchu gan eich stumog, fel:
Fel arfer, bydd angen i chi gymryd y math hwn o feddyginiaeth am 4 neu 8 wythnos, yn dibynnu pa mor ddifrifol yw eich adlif asid.
Pwysig
Ewch yn ôl at y meddyg teulu os bydd eich symptomau'n dychwelyd ar ôl rhoi'r gorau i'ch meddyginiaeth. Gall fod angen presgripsiwn hirdymor arnoch.
Profion a llawdriniaeth ar gyfer llosg cylla/dŵr poeth ac adlif asid
Os na fydd meddyginiaethau'n helpu neu os bydd eich symptomau'n ddifrifol, gall eich meddyg teulu'ch atgyfeirio i arbenigwr ar gyfer:
- profion i ddarganfod beth sy'n achosi'ch symptomau, fel gastrosgopi (pan roddir tiwb tenau gyda chamera arno i lawr eich gwddf)
- llawdriniaeth i atal adlif asid - o'r enw laparoscopic fundoplication